Ngjarjet e javës
1
8 gusht '09 - Ministria e Shëndetësisë e Republikës së Kosovës ka bërë të ditur se janë regjistruar edhe katër raste të reja të gripit të derrave. Me këto raste, numri i personave të konfirmuar si pozitiv me virusin A H1N1 në Kosovë ka shkuar në gjashtë.
2
8 gusht '09 - Trupat e pajetë të Trajanka (59) dhe Bogdan (65) Petkoviqit, që janë gjetur të vdekur në shtëpinë e tyre më 7 gusht, në Partesh të Gjilanit, janë bartur në Institutin për Mjekësi Ligjore në Prishtinë, ka deklaruar zëdhënësi i Policisë së Kosovës, Arbër Beka. Ministri për Kosovën, Goran Bogdanoviq, rastin e kishte cilësuar të motivuar etnikisht dhe kishte kërkuar hetime nga një grup neutral ndërkombëtar.
3
8 gusht '09 - Terroristi më i kërkuar në Indonezi, Nurdin Mohamed Top, është vrarë në një sulm të policisë, në rajonin qendror në Java, ka bërë të ditur stacioni televiziv Metro. Nurdin Mohamad Top, me nacionalitet malaizias, dyshohet se ka qenë një nga organizatorët kryesorë të atentateve që kishte ndërmarrë organizata terroriste, Xhema Islamija, nga viti 2000, siç ishte ai në Bali në vitin 2002, kur u vranë 200 veta.
4
9 gusht '09 - Organizata separatiste baske ETA e ka pohuar përgjegjësinë për sulmet e fundit në Spanjë. Në një deklaratë të lëshuar në gazetën probaske “Gara”, grupi e pohoi përgjegjësinë për sulmin me automjet bombë më 19 korrik, që la të vdekur inspektorin e policisë, Eduardo Puelles Garcia, në qytetin bask Arrigorriaga. Në deklaratë gjithashtu u mor përsipër sulmi me automjet bombë më 30 korrik, para objektit të policisë në qytetin Majorka, ku u vranë dy pjesëtarë të policisë paramilitare të Gardës Civile.