Kreu i Agjencisë Ndërkombëtare për Energji Bërthamore (IAEA), Mohamed El Baradei, i bëri thirrje Iranit që “së shpejti” ta japë përgjigjen ndaj marrëveshjes, e cila synon t’i zbutë tensionet lidhur me programin e dyshuar bërthamor të tij.
ElBaradei i tha Asamblesë së Përgjithshme të Kombeve të Bashkuara se plani i ofron Teheranit mundësinë për “të ndërtuar besimin”.
Po sot, kërkesë të ngjashme nga Moska bënë edhe shefat e diplomacive të Britanisë dhe Rusisë, Dejvid Milliband dhe Sergei Lavrov.
Propozimi, i cili është mbështetur edhe nga Shtetet e Bashkuara, parashikon që Irani t’i dërgojë sasitë më të mëdha të uraniumit jashtë vendit për t’u konvertuar në karburant bërthamor për raktorin kërkimor në Teheran.
Më herët, Ministri i Jashtëm i Iranit, Manusher Motaki tha se Teherani dëshiron që marrëveshjen ta shqyrtojë një komitet teknik.
