Një zyrtar i Kombeve të Bashkuara i ka bërë thirrje Shqipërisë që të bashkëpunojë plotësisht me hetimet mbi pretendimet për vrasjen e civilëve serbë për trafikimin e organeve gjatë luftës në Kosovë në vitin 1999.
Filip Alston, raportues special i Komisionit për të Drejtat e Njeriut, tha se qeveria shqiptare u ka ngritur “barriera të pengesave formale” hetimeve.
Zyrtarët serbë kanë pohuar se ish luftëtarët e UÇK-së i kanë dërguar serbët e rrëmbyer në Shqipëri gjatë luftës, i kanë vrarë dhe ua kanë shitur organet në tregun e zi.
Kosova dhe Shqipëria i kanë mohuar fuqimisht pretendimet për trafikim organesh, të cilat për të parën herë u shfaqën në librin e ish kryeprokurores së Tribunalit të Hagës, Karla del Ponte.
