Kryeministri i Kirgizisë mohoi sot se guvernatori i rajonit po mbahet peng nga protestuesit e opozitës në qytetin veriperëndimor Talas.
Sidoqoftë, kryeministri Danijar Usenov konfirmoi se një grup protestuesish e kanë pushtuar ndërtesën qeveritare në Talas.
Ai tha se qeveria do të dërgojë 100 policë shtesë për të rivendosur rendin.
Komentet e tij u bënë pak pasi agjencia Reuters citoi një zëdhënëse të partisë opozitare, Ata Meken, të ketë thënë se selia e ndërtesës është pushtuar ndërsa guvernatori është marrë peng.
Më herët, shërbimi për Kirgizinë i Radios Evropa e Lirë raportoi se policia nuk ka bërë asgjë për t’i penguar protestuesit që të hyjnë dhe të marrin ndërtesën.
Opozita e akuzon qeverinë e presidentit Kurmanbek Bakiev për shtypje të mediave dhe nxitje korrupcioni.
