Agjencia Ndërkombëtare për Energji Bërthamore (ANEB) tha se ka pranuar njoftimin formal nga Irani mbi marrëveshjen për këmbimin e një pjese të uraniumit të pasuruar për karburant bërthamor.
Marrëveshja e cila u ndërmjetësua nga Turqia dhe Brazili, i bën thirrje Teheranit të dërgojë më shumë se gjysmën e sasisë së uraniumit në Turqi në këmbim për shufra të karburantit bërthamor.
Por propozimi nuk e përmbush kërkesën që Irani gjithashtu të obligohet t’i ndërpresë aktivitetet për pasurimin e uraniumit.
Agjencia tha se do t’ua kalojë letrën Shteteve të Bashkuara, Francës dhe Rusisë për shqyrtim.
Uashingtoni e trajtoi marrëveshjen me skepticizëm dhe prezantoi në Këshillin e Sigurimit një draft-rezolutë për sanksione kundër Iranit.
Emisari iranian në agjencinë, Ali Asgar Soltanie, tha se vendimi i Iranit për të vazhduar pasurimin e uraniumit në nivele të larta “nuk është çështja”.
Ai tha se Teherani mund ta braktisë marrëveshjen për këmbimin e uraniumit nëse Këshilli i Sigurimit do të miratonte sanksione të reja.
