Të nderuar lexues,
Në rubrikën tonë të re “Intervista online” do të mund të takoheni me personalitete të ndryshme. Ju mund të shtroni pyetje nga më të ndryshmet për të mësuar më shumë për jetën dhe veprimtarinë e tyre dhe përgjigjet do t’i merrni nga vetë ata, pasi të jetë mbyllur forumi.
Mysafiri ynë i radhës është këngëtari Mentor Mripa.
Mentor MRIPA është i lindur më 13.03.1973 në Mitrovicë. Shkollimin fillor dhe të mesëm e ka vijuar në Prizren dhe në Pejë, në shkollën për fëmijë dhe të rinj të verbër dhe me të parë të dobët. Si person me nevoja të veçanta (i verbër që nga lindja), ai ka mbaruar shkollën e mesme të fizioterapisë, ndërkaq, aktualisht ka përfunduar vitin e parë të studimeve në Degën e Gazetarisë, në Universitetin e Prishtinës. Aktualisht jeton në Prishtinë. Në sferën e muzikës, Mentor Mripa ka marrë pjesë në festivalin “Akordet e Kosovës”, gjatë viteve 1995 dhe 1996. Është fitues i trefishtë i festivalit të këngës “Zambaku i Prizrenit” në Prizren (2000, 2002 dhe 2004), fitues i çmimit për tekstin më të mirë të këngës në “Show –Fest 2003” në Prishtinë dhe fitues i “Çmimit të publikut” në festivalin “Lyrafest” në Gjakovë, në vitin 2007. Në vitin 2006, festivali “Zambaku i Prizrenit” i ka ndarë çmimin falënderues për kontributin e dhënë në këtë festival. Mentor Mripa është personi i parë i verbër në Kosovë që ka luajtur në një video film (“Një pallto për babanë tim në burg” – 1997). Ka punuar në Radio Mitrovica në vitin 1999, në Radio Besa (Prizren) në vitin 2000, si dhe në Radio Heliks (Prizren) në vitin 2001. Në vitin 2002 ka filluar të punojë në Radio Kosova në Prishtinë, ku edhe punon aktualisht.