Ndërlidhjet

SHBA: U akuzua personi që u përpoq ta vriste Obamën


Autoritetet e Shteteve të Bashkuara e kanë akuzuar personin Oskar Ortega-Hernandez, 21 vjeçar, për përpjekje për vrasjen e presidentit Barak Obama, pasi ai ka shtënë me armë në Shtëpinë e Bardhë.

Ortega-Hernandez është paraqitur mbrëmë në një gjykatë në Pitsburg të Pensilvanisë, për t’i dëgjuar akuzat ndaj tij, të cilat mund të rezultojnë me dënimin maksimal, që është burgimi i përjetshëm.

Sipas dosjes së gjykatës, një dëshmitar, që e ka njohur të dyshuarin në Ajdaho, prej nga ai është, tha se ai “dëshironte ta dëmtonte” Obamën, të cilit i referohej si “djall dhe anti Krisht”.

Në incidentin e 11 nëntorit, shumica e plumbave e qëlluan pjesën e jashtme të ndërtesës, por njëri pjesërisht e theu dritaren me xham anti-plumb.

Policia e gjeti një pushkë gjysmë automatike në një automobil të braktisur, disa orë më vonë.

Presidenti Obama dhe familja e tij në kohën e të shtënave nuk ishin në Uashington dhe askush nuk është lënduar.
XS
SM
MD
LG