Rusi: Mospajtime për konferencën për Sirinë

Një zyrtar rus ka thënë se ka mospajtime lidhur me atë se kush ka të drejtë të marrë pjesë në procesin e paqes në Siri, duke sugjeruar se kjo mund t’i dëmtoj përpjekjet për organizimin e një konference ndërkombëtare.

Sekretari amerikan i shtetit, John Kerry, dhe ministri i jashtëm i Rusisë, Sergei Lavrov, të Enjten në Moskë shpallën se Uashingtoni dhe Moska do të synojnë organizimnin e konferencës për Sirinë dhe kanë shfaqur shpresën se ajo do të mund të mbahej këtë muaj.

Agjencitë perëndimore dhe ato ruse të lajmeve e kanë cituar një zyrtar të paemëruar, i cili ishte i pranishëm në takimin Kerry – Lavrov, që ka thënë se mbajtja e takimit ndërkombëtar “në fund të muajit Maj është e pamundshme”.

Rusia i ka kundërshtuar sanksionet kundër Sirisë, por i ka mbështetur thirrjet për krijimin e një qeverie të tranzicionit.

Kombet e Bashkuara vlerësojnë se nga konflikti dyvjeçar në Siri janë vrarë së paku 70 mijë njerëz.