Një video në të cilën shihet jë politikan japonez duke qarë me zë gjatë një konference me gazetarë, pas akuzave për shpenzime të shumta nëpër udhëtime është kthyer në hit të vërtetë në internet, raporton Associated Press.
Në videon e cila është shpërndarë me të madhe në rrjetin social, “YouTube”, shihet Ryutaro Nonomura, 47 vjeçar, politikan lokal në prefekturën e Hyogos, duke qarë me lot, dhe duke thënë fjali që më të shumtën nuk kishin kuptim dhe duke i rënë tavolinës me grusht.
Video është postuar nga shumë persona “online” ndërsa vetëm njëri nga postimet deri sot në mëngjes është parë nga 640 mijë persona.
Konferenca e tij është mbajtur të martën pas publikimit të një raporti në një nga gazetat e Japonisë që nxiste dyshime për shpenzime të tepruara nëpër udhëtime duke përdorur paratë e buxhetit.
Vizitat e këtij politikani nuk janë të jashtëligjshme dhe ato ishin raportuar, por shuma e përdorur ishte 30 mijë dollarë.
Pas publikimit të videos së politikanit që qanë me zë, publiku japonez është tronditur.
Shpërthimi në vaj në shoqërinë konservatore japoneze nuk është aspak i preferueshëm, ndërsa më të pëlqyerit janë politikanët e qetë dhe që nuk përdorin zë të lartë.
