Ushtria ukrainase ka thënë se raketat që kanë rrëzuar të mërkurën dy aeroplanë luftarakë të Ukrainës, janë hedhur nga territori i Rusisë.
Këshilli për Siguri dhe Mbrojtje Kombëtare i Ukrainës ka thënë se “në bazë të informatave të para, raketat janë hedhur nga territori rus”.
Më herët, zyrtarët ukrainas kanë fajësuar rebelët pro-rusë për rrëzimin e dy avionëve Su-25s në lindje të vendit.
Zyrtarët ushtarakë kanë thënë se pilotët kanë arritur të dalin nga aeroplanët, porse vendndodhja dhe gjendja e tyre nuk dihen.
Sulmi ndaj dy avionëve luftarakë vjen pak ditë pas rrëzimit të një aeroplani të Malajzisë në lindje të Ukrainës.
Të 298 njerëzit në bordin e këtij aeroplani, shumica nga ta shtetas holandezë, kanë vdekur.
Dyshohet se separatistët pro-rusë e kanë sulmuar atë me raketë.