Së paku shtatë persona janë vrarë dhe 20 të tjerë janë plagosur nga dy shpërthime vetëvrasëse në Kabul të Afganistanit.
Përgjegjësinë për sulmet e kanë marrë talibanët.
Policia ka thënë se të dyja shpërthimet kanë pasur në shënjestër autobusë që transportonin trupa të ushtrisë afgane.
Dhuna e fundit vjen një ditë pasi Afganistani dhe Shtetet e Bashkuara kanë nënshkruar një marrëveshje, e cila u mundëson afro 10,000 trupave amerikane të mbeten në Afganistan edhe pas përfundimit të misionit luftarak ndërkombëtar në fund të këtij viti.
