Aktivistët sirianë thonë se militantët e Shtetit Islamik kanë avancuar më thellë në qytetin sirian Kobani, në kufirin me Turqinë.
Aktivistët e Observatorit sirian për të drejtat e njeriut, me seli në Londër, thanë mbrëmë se luftëtarët e Shtetit Islamik e kanë okupuar “së paku 40%” të qytetit.
Ky grup, që e ka rrjetin e aktivistëve në Siri, tha se militantët e kanë marrë kontrollin pothuase në gjithë hapësirën, ku është e vendosur administrata lokale kurde e qytetit.
Në Gjenevë, i dërguari i Kombeve të Bashkuara për Sirinë, Staffan de Mistura, i ka bërë thirrje Turqisë, që t’i lejoj vullnetarët të kalojnë nga Siria, në mënyrë që të parandalohet masakra e mundshme nga luftëtarët e Shtetit Islamik në Kobani.
De Mistura tha se afro 700 civilë të moshuar ende janë brenda qytetit, ndërsa më se 10 mijë të tjerë janë tubuar në afërsi të tij.