Presidenti i Shteteve të Bashkuara, Barack Obama, do të takojë sot zyrtarët e Qeverisë amerikane për të diskutuar përgjigjen ndaj rastit me Ebola në Dallas të Teksasit.
Në takim do të shqyrtohet edhe gatishmëria e infrastrukturës kombëtare për t’u përballur me virusin vdekjeprurës, ka bërë të ditur Shtëpia e Bardhë.
Të dielën, Departamenti i Shëndetësisë në Teksas ka konfirmuar se një punëtore shëndetësore ka rezultuar pozitive ndaj Ebolës.
Ajo ka trajtuar viktimën e parë nga ky virus në SHBA, Thomas Duncan, i cili ka marrë virusin në Liberi dhe ka vdekur javën e kaluar në Teksas.
Infermierja është personi i parë në Shtetet e Bashkuara që merr virusin Ebola, por që nuk ka vizituar Afrikën perëndimore.