Rusia nuk është paraqitur në takimin për përgatitjen e Samitit të Sigurisë Atomike në vitin 2016, kanë thënë mbrëmë zyrtarë amerikanë dhe evropanë, që paraqet një goditje serioze ndaj përpjekjeve të presidentit amerikan, Barack Obama, për ta forcuar trashëgiminë e tij duke e lënë botën më të sigurt nga terrorizmi bërthamor, se sa që ishte kur u bë president.
Zyrtarët thanë se nuk ishte menjëherë e qartë nëse Moska ka për qëllim bojktimin e samitit ose vetëm ka treguar se përkohësisht është e pakënaqur lidhur me dënimin e ashpër nga Uashingtoni për rolin e Moskës në kryengritjen në Ukrainë dhe sanksionet ndërkombëtare perëndimore të udhëhequra nga Shtetet e Bashkuara, raporton agjencia AP nga Vjena.
Në samitin e fundit këtë vit në Hagë, 35 vende shprehën përkushtim që udhëzimet ndërkombëtare për siguri atomike të shndërrohen në legjislacion kombëtar.
Por, në këtë samit nuk ishte e pranishme Rusia, së bashku me Kinën, Indinë dhe Pakistanin, të gjitha vende me armatim atomik.