Militantët e Shtetit Islamik në Siri e kanë rrëzuar një aeroplan ushtarak që besohet se i takon koalicionit të udhëhequr nga Shtetet e Bashkuara.
Observatori sirian për të drejtat e njeriut me bazë në Londër, ka njoftuar se aeroplani ëstë rrëzuar sot në afërsi të qytetit Raqqa.
Observatori ka njoftuar se aeroplani i rrëzuar i takon koalicionit që udhëhiqet nga Shtetet e Bashkuara.
Observatori ka thënë se një arab që kishte qenë pilot i aeroplanit, është kapur nga militantët.
Qendra mediale në Raqqa ndërkaq ka raportuar se piloti është jordanez.
Ende nuk ka asnjë koment nga Jordania e as nga ndonjëri prej shteteve që e përbëjnë koalicionin.
Shtetet e Bashkuara dhe aleatët arabë, i kanë filluar sulmet ajrore kundër caqeve të IS-it, në shtator.
Arabia Sauidite, Jordania, Bahraini dhe Emiratet e Bashkuara Arabe janë bashkuar gjithashtu në sulmet ajrore kundër ekstremistëve derisa Katari është duke ofruar mbështetje logjistike.
