Kryeministri i Serbisë, Aleksandar Vuçiq, pritet që gjatë ditës së sotme ta vizitojë Kosovën.
Sipas Beogradit, Vuçiq dhe delegacioni i tij, do t’i vizitojnë lokacionet e banuara me serbë me rastin e Vitit të Ri ortodoks.
Asnjë takim me udhëheqësit e Kosovës nuk është planifikuar.
Ministri i jashtëm i Kosovës, Hashim Thaçi, ka thënë se Prishtina e ka aprovuar vizitën e tij, të cilën ai e ka quajtur të natyrës “humanitare dhe fetare”.
Vuçiq gjatë qëndrimit të tij në Kosovë, pritet ta vizitojë fshatin Pasjan të Gjilanit, Shtërpcen si dhe Graçanicën.
Vizitën e delegacionit të Serbisë në Kosovë po e sigurojnë njësitë e Policisë së Kosovës, përfshirë këtu edhe njësitë speciale, në bazë të një plani të paraparë për sigurimin e vizitave të delegacioneve të huaja në Kosovë.
Nga Policia e Kosovës kanë deklaruar për Radion Evropa e Lirë se është angazhuar një numër i mjaftueshëm për të siguruar vizitën e sotme.