Raportet nga Jemeni thonë se rebelët shiit Huthi i kanë sulmuar dhe arrestuar demonstuesit që po protestonin kundër kapjes së institucioneve nga ana e tyre në kryqytetin Sanaa.
Rebelët gjithashtu e kanë bllokuar hyrjen në Universitetin Sanaa, ku studentët kishin organizuar sot një protestë.
Militantët që nga shtatori i vitit të kaluar e kanë marrë nën kontroll kryeqytetin Sanaa, ndërsa gjatë javës së kaluar e kanë marrë edhe presidencën.
Presidenti Abed Rabbo Mansour Hadi ka dhënë dorëheqje pas disa ditësh.
Rebelët e grupit Huthi thonë se vetëm duan të jenë të barabartë në pushtet.
Kritikët thonë se Huthi dëshiron ta marr pushtetin dhe e akuzojnë këtë grup se janë përfaqësues të Iranit, gjë të cilën kryengritësit e mohojnë.
Vakumi institucional ka përhapur frikën se dega e Al-Qaeda në Jemen do të rritet dhe të bëhet edhe më e fuqishme.
Raportet e sotme bëjnë me dije se si rezultat i sulmeve të telekomanduara nga Shtetet e Bashkuara, janë vrarë tre militantë të dyshuar të Al-Qaedas.
