Kancelarja gjermane, Angela Merkel, thotë se perspektiva për paqe në Ukrainë mbetet e mjegulluar edhe pas bisedimeve me presidentin rus, Vladimir Putin.
Këto komente Merkel i ka bërë sot gjatë fjalës së saj në Konferencën e Sigurisë në Munich, ku temë kryesore është konflikti në Ukrainë.
Kancelarja gjermane mbrëmë së bashku me presidentin e francës, Francois Hollande, e kanë përfunduar takimin në Moskë me presidentin Putin.
Merkel është shprehur sot se nuk është e sigurtë nëse bisedimet me Putin do të kenë sukses.
Hollande ka thënë në anën tjetër, se përpjekjet franko-gjermane janë një nga shanset e fundit për paqe.
