Sekretari i përgjithshëm i NATO-s, Jens Stoltenberg, ka thënë se është “thellësisht i shqetësuar” me situatën përreth qytetit të rrethuar të Debaltseves.
Ai ka thënë se refuzimi i separatistëve për të respektuar armëpushimin kërcënon Marrëveshjen e Minskut.
Stoltenberg i ka bërë thirrje Rusisë që t’i japë fund mbështetjes për separatistët dhe të tërheqë forcat e saj nga lindja e Ukrainës.
Në Berlin, zëdhënësi i kancelares gjermane, Angela Merkel, ka thënë se Gjermania “dënon fuqishëm aksionet e separatistëve në Debaltseve”, duke i cilësuar ato si “shkelje të mëdha” të marrëveshjes së fundit për armëpushim.
Zëdhënësi i Qeverisë franceze, Stephane Le Foll, ka thënë se marrëveshja për armëpushim nuk ka vdekur” dhe se vendi i tij do të bëjë gjithçka të mundur për ta mbajtur atë gjallë.
Presidenti i Ukrainës, Petro Poroshenko, ka thënë se forcat qeveritare janë duke përfunduar tërheqjen “e planifikuar dhe të organizuar” nga qyteti lindor i Debaltseves, i cili ka qenë epiqendër e luftimeve midis trupave të Ukrainës dhe separatistëve pro-rusë.
Armiqësitë kanë vazhduar përkundër armëpushimit të ndërmjetësuar nga liderët evropianë javën e kaluar.
Debaltseve është një qendër kryesore hekurudhore që lidh qytetet e kontrolluara nga rebelët, Donjeck dhe Luhansk.