Raportohet se forcat e Irakut e kanë marrë kontrollin ndaj disa pjesëve të një qyteti afër Tikritit, që ishin nën militantët e grupit ekstremist, Shteti Islamik.
Komandantët ushtarakë thanë se trupat dhe milicitë shiite sot e morën qendrën e qytetit, Al-Alam, dhe se janë të përgatitura për të luftuar për t’i marrë edhe pjesët e tjera.
Ushtria e Irakut e ka filluar një ofensivë javën e kaluar, që synon dëbimin e militantëve të IS-it nga Tikriti, që prej qershorit të vitit të kaluar është nën kontrollin e militantëve të Shtetit Islamik.