Britania ka nderuar ushtarët që kanë vdekur dhe kanë shërbyer në Afganistan me një shërbesë përkujtimore dhe paradë ushtarake.
Mbretëresha Elizabetë dhe anëtarët tjerë të familjes mbretërore u janë bashkuar veteranëve në Katedralen e Shën Paulit në Londër.
Britania ka qenë pjesë e koalicionit të udhëhequr nga Shtetet e Bashkuara, që ka luftuar talibanët në Afganistan, pas sulmeve të 11 shtatorit, 2001, në SHBA.
Rreth 150,000 britanikë kanë shërbyer në këtë konflikt, ndërsa 453 e tyre kanë vdekur.
Britania ka përfunduar formalisht fushatën 13-vjeçare në Afganistan në tetor të vitit 2014.
Misioni ndërkombëtar, ndërkaq, ka pushuar operacionet luftarake në fund të dhjetorit, duke lënë sigurinë në duart e forcave afagne.
Disa qindra ushtarë të huaj vazhdojnë të mbeten në Afganistan me rol këshillues.