Boksieri profesionist amerikan, Floyd Mayweather, e ka mundur me pikë , rivalin e tij nga Filipinet, Manny Pacquiao, në duelin i cili e kishte fondin më të lartë të shpërblimeve në historinë e këtij sporti.
Këtë takim, mbrëmë vonë në Grand Garden Arena në Las Vegas të Shteteve të Bashkuara, i cili ishte cilësuar si “luftë e shekullit”, e kanë ndjekur afro 17 mijë shikues.
Mayweather, 38-vjeçar, në fillim u ballafaqua me një stil agresiv të boksierit Pacquiao, 36-vjeçar, dhe u mbështet në mbrojtjen e tij të njohur me kundërgoditje, që i mundësoi të dominojë në këtë duel të shumëpritur prej 12 raundesh të kategorisë velter.
Besohet gjerësisht se ky takim ishte më fitimprurësi në historinë e boksit, pasi të ardhurat ishin afro 400 milionë dollarë.
Fituesi Mayweather, i cili pas këtij dueli mbetet i pamposhtur duke triumfuar në 48 takimet në karrierën e tij, mund t’i ketë fituar së paku 180 milionë dollarë.
Ai tha se do të tërhiqet nga boksi në muajin shtator, kur do ta ketë duelin e fundit në karrierë.
Të tre gjyqtarët i dhanë fitore boksierit Mayweather.
Tash ai i mban titujt e kampionit botëror në tri versione: Këshilli Botëror i Boksit (WBC), Asociacioni Botëror i Boksit (WBA) dhe Organizata Botërore e Boksit (WBO), ku deri tash kampion ishte Pacquiao.