Problemi me emigrantët ilegalë në vendet e Ballkanit Perëndimor, ka dominuar në Samitin e Ministravetë jashtëm të Iniciativës së Evropës Qendrore, në Ohër.
Shtetet pjesëmarrës kanë kërkuar që në strategjinë evropiane për menaxhim me këtë fenomen, të përfshihet edhe rajoni ballkanik.
“Nëse BE-ja siguron fonde dhe koordinohet mes vete për t’u ballafaquar me këtë problem, mendoj se nuk është e mundur të mendohet se kjo të bëhet me sukses pa përfshirjen tonë në strategjinë e tyre”, ka deklaruar, Nikolla Popovski, Ministër i jashtëm i Maqedonisë.
Ministri i jashtëm i Serbisë, Ivica Daçiq, tha se problemi me emigrantët ilegalë vazhdon të jetë serioz për Maqedoninë dhe Serbinë.
“Emigrantët ilegalë në shtetet tona hyjnë përmes BE-së. Për këtë BE-ja duhet të përgatit mekanizma dhe të vërtetohet pse kufijtë e tyre janë shumë të dobët dhe si mund të kalojnë aq shumë emigrantë ilegalë ”, ka deklaruar Daçiq.
Në samit, i cili ka filluar dje, është diskutuar edhe për gjendjen e sigurisë në Maqedoni, me ç’rast është theksuar se stabiliteti i saj ka rëndësi të madhe edhe për stabilitetin e rajonit.
Në samit në cilësinë e shtetit mysafir është ftuar edhe Kosova, e cila është përfaqësuar nga ambasadori i Kosovës në Maqedoni, Ylber Hysa.