Drejtorati Kombëtar për Siguri i Afganistanit thotë se ish-zëdhënësi i talebanëve të Pakistanit, i cili ishte deklaruar se është besnik ndaj grupit militant Shteti Islamik, është vrarë gjatë sulmeve ajrore në lindje të Afganistanit.
Zyrtarët afganë thonë se Mawlavi Shahidullah Shahid është vrarë më 7 korrik nga sulmet ajrore në qarkun Achin në Provincën Nangarhan të Afganistanit.
Shahid është shkarkuar nga pozita e zëdhënsit të talebanëve të Pakistanit në tetorin e vitit 2014, pasi ishte bërë militanti i parë në atë zonë që publikisht ka deklaruar aleancën e tij me grupin militant Shteti Islamik.
Më pas ai u bë lider i IS-it për rajonin që grupi militant e quan Khorasan, rajon ky që kufizohet me Afganistanin, Pakistanin dhe me shtetet e tjera fqinje.
Zyrtarët afganë njoftojnë se kreu i operacioneve të militantëve të Shtetit Islamik për Afganistan, Gul Zamn Fateh së bashku me zëvendësin e tij Jahadyar janë vrarë po ashtu nga sulmet ajrore.