Komisioni Evropian ka njoftuar sot se presidenti i Ukrainës, Petro Poroshenko, gjatë dy javëve të ardhshme planifikon ta vizitoj Brukselin për të diskutuar për rritjen e dhunës në pjesën lindore të Ukrainës, që e ka rrezikuar marrëveshjen për armëpushim ndërmjet separatistëve prorusë dhe forcave të qeverisë së Ukrainës.
Përleshjet ndërmjet forcave qeveritare dhe separatistëve afër qytetit-port Mariupol në Ukrainë, i kanë shtuar shqetësimet se marrëveshja e armëpushimit, e arritur në muajin shkurt në Minsk të Bjellorusisë, mund të shkatërrohet tërësisht.
Parashihej që kjo marrëveshje të implementohej deri në fund të vitit 2015.
Monitoruesit e Organizatës për Siguri dhe Baskëpunim në Evropë (OSBE) i kanë akuzuar të dy palët për shkelje të marrëveshjes.
