Rusia ka kritikuar mënyrën se si Bashkimi Evropian po trajton krizën me refugjatë dhe ka lënë të kuptohet se blloku është fajtor për nxitjen e konflikteve që kanë shkaktuar migrimin masiv.
“Drejtësia sigurisht kërkon që ata vende që mbajnë përgjegjësi për shpërthimin e konflikteve, të marrin përgjegjësi të madhe edhe për sigurimin e ndihmës humanitare për viktima”, ka thënë ministri i Jashtëm rus, Sergei Lavrov.
Ai i ka bërë këto komente në Moskë, në një takim me nënpresidenten e Komisionit Evropian, Kristalina Georgieva.
Bashkimi Evropian është duke u përballur me një fluks të madh migrantësh që ikin nga konfliktet në Lindjen e Mesme dhe Afrikë.
Rusia ka kundërshtuar pushtimin e Irakut nga SHBA-ja, rrëzimin e mbështetur nga Perëndimi të liderit libian, Muammar Gaddafi, si dhe mbështetjen e Perëndimit për rebelët në Siri.
