Republika Çeke nuk do të kthejë kontrollin mbi kufirin e saj me Austrinë, të paktën jo tash për tash, ka thënë të hënën ministri i jashtëm çek, Lubomir Zaoralek.
Deklarata e tij pason vendimin e Gjermanisë për të rikthyer kontrollin e kufirit me Austrinë, për të kontrolluar hyrjen e mijëra azil-kërkuesve në ditë.
Berlini ka paralajmëruar se kjo masë e përkohshme do vendoset fillimisht në kufirin jugor me Austrinë.
“Për ne, situata nuk është e tillë që do të na shtynte të shqyrtonim masat fundmanetale”, ka thënë ministri çek, për agjencinë çeke të lajmeve, ÇTK.
Deri më tash, autoritetet çeke vetëm kanë shtuar numrin e personelit në njësitë patrolluese të zakonshme, përgjatë kufirit me Austrinë.
Migrantët kanë shfrytëzuar transportin e Austrisë për të arritur në Gjermani, ndonëse disa prej tyre kanë shfrytëzuar edhe territorin çek për të depërtuar drejt Evropës Perëndimore.
Kufijtë e hapur ndërmjet vendeve evropiane, të cilat kanë nënshkruar Traktatin e Schengenit, janë një nga kriteret kryesore të këtij projekti evropian, ndonëse kontrolli mbi kufijtë mund të ritkthehet sipas Traktatit, me kusht që masat e tilla të jenë të përkohshme.
