Policia në Irak thotë se dy prej 18 punëtorëve turq, që janë rrëmbyer në kryeqytetin Bagdad, në fillim të këtij muaji, janë liruar në provincën Basra.
Një zëdhënës i policisë në qytetin Basra tha se këta dy persona, sot në mëngjes, i ishin paraqitur një patrulle të policisë në këtë qytet.
U tha se këta dy vetë ishin në gjendje të mirë shëndetësore.
Grupi prej 18 shtetasve të Turqisë është rrëmbyer më 2 shtator, në një punishte ndërtimore në lagjen Sadr City në Bagdad, që është e banuar me popullatë shumicë myslimane shiite.
Javën e kaluar,në një video të një grupi militant më parë të panjohur, janë paraqitur personat e rrëmbyer dhe kërkohej që Turqia, ta ndalë rrjedhën e militantëve në Irak dhe ta ndalë atë që përshkruhej si “rrethim” i qyteteve të Sirisë.
