Ushtria e Irakut është duke bashkëpunuar me homologet e saj nga Rusia, Irani dhe Siria për t’iu kundërvënë kërcënimit që paraqet grupi militant i Shtetit Islamik (IS).
Kështu bën të ditur një komunikatë e lëshuar nga komanda e operacioneve të përbashkëta të ushtrisë irakiane.
Në komunikatë thuhet se marrëveshja është arritur pas shqetësimeve të Rusisë për praninë e mijëra terroristëve rusë në aktet kriminale të Shtetit Islamik.
Komunikata është në kundërshtim me komentet e ministrit të Jashtëm irakian, Ibrahim al-Jafaari, i cili ka thënë se vendi i tij nuk ka asnjë këshilltar ushtarak rus që ndihmon forcat e tij.
Kritikët i kanë bërë thirrje presidentit të Shteteve të Bashkuara, Barack Obama, që të jetë më i vendosur në Lindjen e Mesme, sidomos sa i përket konfliktit në Siri.
Ata kanë thënë se mungesa e një politike të qartë amerikane i ka dhënë IS-it mundësi për t’u zgjeruar.