NATO ka dënuar shkeljen ajrore të Turqisë, nga ana e Rusisë, duke e cilësuar si veprim të rrezikshëm dhe të papërgjegjshëm.
Pas një mbledhje urgjente NATO ka thënë se “aleatët e kundërshtojnë fuqishëm shkeljen sovrane të hapësirës ajrore të Turqisë dhe dënon këtë shkelje të hapësirës ajrore të NATO-së.”
“Aleatët tërheqin vërejtjen për një veprim të tillë të rrezikshëm dhe të papërgjegjshëm,” thuhet në deklaratë.
Ministria e jashtme e Turqisë ka thënë se aeroplanët luftarakë të Rusisë e kanë dhunuar hapësirën ajrore të Turqisë.
Ministria e jashtme turke, mëtutje, njoftoi se dy aeroplanë luftarakë turq të tipit F-16 e kanë detyruar aeroplanin rus që të largohet nga hapësira ajrore e Turqisë.
NATO ka kritikuar sulmet ajrore të Rusisë, në Siri, të cilat po i targetojnë grupet që po luftojnë kundër presidentit sirian, Bashar al –Assad.