Nga një sulm me automjet dhe me thikë sot në Bregun Perëndimor janë plagosur pesë izraelitë.
Në valën më të re të dhunës, një sulmues palestinez me veturën e tij e ka goditur një grup të izraelitëve, që qëndronin në një stacion në Bregun Perëndimor, me ç’rast janë lënduar katër vetë, derisa sulmuesi është vrarë nga pjesëtarët e sigurisë.
Në një tjetër incident, një grua palestineze e ka therrë me thikë një roje të sigurisë në hyrje të një vendbanimi në Bregun Perëndimor.
Ushtria e Izraelit tha se roja ishte lënduar lehtë, ndërsa gruaja ishte qëlluar për vdekje.
Prej muajit tetor, nga vala e sulmeve me thika, armatime dhe goditje me automjete, janë vrarë 73 palestinezë, gjysma prej tyre sulmues të dyshuar, 9 izraelitë dhe një arab izraelit.
Dhuna ndërmjet palestinezëve dhe izraelitëve është intensifikuar edhe në pjesën lindore të Jerusalemit dhe Rripin e Gazës.