Ambasadat e Francës, Gjermanisë, Italisë, Mbretërisë së Bashkuar dhe Shteteve të Bashkuara në Prishtinë kanë dënuar përdorimin e vazhdueshëm të dhunës për, siç kanë thënë, arritjen e qëllimeve politike.
“Apelojmë për respektim të sundimit të ligjit, procedurave demokratike dhe normave ndërkombëtare. Dhuna politike është e papranueshme dhe dëmton interesat e qytetarëve të Kosovës dhe pozitën ndërkombëtare të Kosovës. Ajo nuk i sjell dobi askujt”.
“Ne përgëzojmë Policinë e Kosovës për profesionalizmin dhe theksojmë rëndësinë që ka bindja ndaj ligjit nga ana e të gjithë qytetarëve, pa marrë parasysh rangun apo pozitën”, thuhet në deklarëtn e përbashkët të ambasadave të Quint-it.
Të mërkurën në Prishtinë ka pasur skena dhune midis protestuesve dhe policisë.
Protestuesit kanë kundërshtuar arrestimin e deputetës së Aleancës për Ardhmërinë e Kosovës, Donika Kadaj Bujupi, për shkak të veprimeve të saj në pengimin e seancave të Kuvendit.
Rreth 22 persona janë arrestuar dhe më shumë se 13 janë plagosur në protestë. Po ashtu janë shënuar edhe dëme të konsiderueshme materiale.
Autoritetet në Kosovë e kanë dënuar ashpër dhunën.
Presidentja Atifete Jahjaga ka thënë se “dhuna kundër policisë dhe vandalizmi i pronës, private e publike nuk mund të arsyetohen në asnjë rast”.
Opozita, për më shumë se dy muaj, ka penguar punën e Kuvendit të Kosovës, duke kërkuar nga kryeministri Isa Mustafa që të tërheqë nënshkrimet nga marrëveshja me Serbinë për Asociacionin e Komunave me Shumicë Serbe dhe nga ajo me Malin e Zi për demarkacionin e kufirit.
Sipas opozitës, marrëveshja e parë çon në ndarje të Kosovës, ndërsa e dyta bën që një pjesë e territorit të Kosovës, pa bazë, t’i takojë Malit të Zi.