Ministri për Integrime Evropiane në qeverinë e Kosovës, Bekim Çollaku, ka thënë se “raporti përfundimtar mbi liberalizimin e vizave është publikuar dhe është pozitiv”.
“Qytetarët e Kosovës janë të gatshëm për udhëtim pa viza në vitin 2016. Mëse e merituar”, ka thënë zoti Çollaku, në rrjetin social Twitter.
Komisioni Evropian ka publikuar raportin e fundit mbi këtë çështje të premten, duke thënë se kanë mbetur edhe 9 kritere nga 95 gjithsej për t’u përmbushur, në mënyrë që Kosova të gëzojë të drejtën e liberalizimit.
Fillimi i vitit 2016 pritet të shënojë intensifikim përpjekjesh për të arritur përmbushjen e këtyre detyrimeve, ashtu siç u kërkua nga Komisioni Evropian.