Mbi 560 mijë migrantë kanë hyrë në Kroaci prejse ka nisur kriza me migrantë, ndërsa të shtunën, deri në orën 9:00 të mëngjesit, kanë hyrë 934 veta, ka bërë të ditur Ministria e Punëve të Brendshme e Kroacisë.
“Të premten kanë hyrë 1,840 migrantë. Nga qendra tranzite e pranimit në Slavonski Brod, ata dërgohen deri te kufiri slloven”, thuhet në komunikatën e MPB-së kroate.
Sipas vlerësimeve të Kombeve të Bashkuara, Evropa është në mesin e krizës më të madhe me migrantë që nga Lufta e Dytë Botërore.
Agjencia për Refugjatë e OKB-së dhe Organizata Ndërkombëtare e Migrimit kanë njoftuar më 22 dhjetor se numri i migrantëve dhe refugjatëve, të cilët kanë arritur në BE këtë vit, qoftë përmes tokës, qoftë përmes detit, ka kaluar një milion.
UNHCR pret që fluks i ngjashëm të vazhdojë edhe gjatë vitit 2016.
Shumica e migrantëve dhe refugjatëve ikin nga luftërat në Lindjen e Mesme.
Disa vende të Evropës kanë ngritur gardhe me tela në kufij për të penguar rrjedhën e tyre.
