Irani dhe Kina janë zotuar për lidhje më të afërta ekonomike dhe politike, pas bisedimeve në Teheran midis presidentëve të të dyja vendeve.
Presidenti kinez, Xi Jinping, është lideri i parë që viziton Iranin prejse janë hequr sanksionet ndërkombëtare kundër tij, javën e kaluar.
Dy liderët kanë nënshkruar 17 marrëveshje për çështje të ndryshme, nga energjia deri te forcimi i tregtisë.
Presidenti i Iranit, Hassan Rohani, ka thënë se ai dhe Xi kanë nënshkruar një “dokument gjithëpërfshirës 25-vjeçar” për marrëdhënie strategjike.
Ata po ashtu kanë diskutuar për terrorizmin, paqëndrueshmërinë në Lindjen e Mesme, si dhe për shkencë, teknologji moderne, kulturë dhe turizëm.
Sanksionet ndërkombëtare kundër Iranit janë hequr javën e kaluar, pasi Republika Islamike ka rënë dakord për të zvogëluar aktivitetin e saj bërthamor.
Kina është partneri më i madh tregtar i Iranit.