Miliona njerëz në Bregdetin Lindor të Shteteve të Bashkuara janë zgjuar të dielën me një shtresë të madhe të borës, e cila ka bllokuar disa rajone.
Në Nju Jork, megjithatë, autoritetet kanë hequr ndalesën e udhëtimit me makina, pasi stuhia masive e fundjavës ka nisur të zvogëlohet dhe të lëvizë drejt Oqeanit Atlantik.
Por, në Uashington sistemi i metrosë do të mbetet i mbyllur edhe sot. Udhëtimi ajror atje po ashtu vazhdon të përballet me ndërprerje.
Së paku 18 persona janë raportuar të vdekur qysh të premten në SHBA, shumica e tyre në aksidente trafiku.
Dhjetëra-mijëra shtëpi kanë mbetur pa energji elektrike, ndërsa gjendje e jashtëzakonshme është shpallur në 11 shtete.
Situata më e rëndë ka qenë në Virxhinian Perëndimore, ku bora ka arritur në 103 centimetra.
Disa meteorologë kanë thënë se kjo stuhi e borës mund të jetë në mesin e dhjetë më të këqijave në histori.