Ndërlidhjet

Aventurieri vdiq duke e kaluar i vetmuar Antarktikun


Princi William (majtas) dhe aventurieri Henry Worsley me flamurin britanik në tetor të vitit të kaluar në Londër

Një aventurier britanik e ka humbur jetën në përpjekje që të jetë njeriu i parë, që e ka kaluar i vetmuar Antarktikun. Ai vdiq për shkak të lodhjes së jashtëzakonshme dhe dehidrimit të madh, 48 kilometra para se ta arrinte qëllimin.

Personi 55 vjeçar, Henry Worlsey, i cili këtë aventurë e ka ndërmarrë për të krijuar fonde për ushtarët e plagosur britanikë, ishte dërguar me helikopter në një spital në Kil, më 22 janar, pasi kishte kërkuar ndihmë në ditën e 71-të të udhëtimit të tij.

Bashkëshortja e tij, Joanna Worsley, tha se ai vdiq në një klinikë në Kil nga “dështimi total i organeve, përkundër të gjitha përpjekjeve” të personelit mjekësor.

Worsley i ka tubuar afro 143 mijë dollarë për fondin humanitar, Endeavour Fund, një organizatë që mbështetet nga Princi Williams, bashkëshortja e tij Kate dhe i vëllai i tij, Princi Harry.

Princi William e ka nderuar të ndjerin Worsley, duke e cilësuar si “njeri që ka treguar guxim të madh dhe përkushtim”.

Henry Worsley, ish-oficer i ushtrisë britanike nga Londra, kishte shpresuar të bëhet njeriu i parë që do ta kalonte i vetmuar Antarktikun, pa mbështetje dhe pa ndihmë nga askush.

XS
SM
MD
LG