Agjencia Reuters raporton se një mekanik i kompanisë ajrore EgyptAir, kushëriri i të cilit i është bashkuar grupit militant Shteti Islamik në Siri, dyshohet për vendosjen e bombës në një aeroplan rus të pasagjerëve, i cili ka shpërthyer në qiejt e Egjiptit, tetorin e kaluar.
Deri më tash, Egjipti ka thënë publikisht se nuk ka gjetur prova se avioni i kompanisë MetroJet është rrëzuar nga vepra që lidhen me terrorizmin.
Avioni është rrëzuar në Gadishullin Sinai pasi është nisur nga aeroporti i Sharm el-Sheikut, duke shkaktuar vdekjen e të 224 njerëzve në bord.
Një zyrtar i lartë i kompanisë ajrore EgyptAir ka mohuar se ndonjë punonjës i saj është arrestuar.
Ngjashëm ka thënë edhe një zyrtar i Ministrisë së Brendshme të Egjiptit.
Por, burime të afërta me çështjen i kanë thënë agjencisë Reuters se mekaniku është arrestuar, së bashku me dy policë të aeroportit dhe një bartës të bagazheve.
