Bashkimi Evropian thotë se po bën plane për tu përballur me një krizë të mundshme humanitare, në kohën kur kufizimet kufitare po i ndalojnë migrantët që të udhëtojnë nëpër Ballkan.
Përmes një deklarate të përbashkët, të martën, komisioneri për Migrim i BE-së, Dimitris Avramopoulos dhe ministri holandez për Migrim, Klaas Dijkhoff, shprehën shqetësimin e tyre lidhur me “zhvillimet nëpër rrugët e Ballkanit dhe krizën humanitare, e cila mund të shtrihet në disa vende, veçanërisht në Greqi.”
Maqedonia ndaloi hyrjen e afganëve më 22 shkurt, disa ditë pas hyrjes në fuqi të kontrolleve të reja nga ana e Austrisë.
Athina ka shprehur “pakënaqësi” ndaj BE-së, lidhur me kufizimet që lanë me mijëra migrantë të bllokuar në Greqi.
Ndërkohë, të dhënat e fundit tregojnë një rritje të lartë të numrit të migrantëve dhe refugjatëve që po arrijnë përmes detit në Itali dhe Greqi.