Kremlini ka bërë të ditur se presidenti rus, Vladimir Putin, ka biseduar në telefon me mbretin e Arabisë Saudite, Salman, dhe se të dy kanë rënë dakord që të vazhdojnë kontaktet në lidhje me zgjidhjen e konfliktit në Siri.
Luftimet në Siri kanë vazhduar pavarësisht një marrëveshjeje të ndërmjetësuar nga Shtetet e Bashkuara dhe Rusia, e cila bën thirrje për armëpushim midis forcave qeveritare të Sirisë dhe luftëtarëve opozitarë, nisur nga data 27 shkurt.
Militantët e Shtetit Islamik dhe të Frontit Al Nusra nuk janë pjesë e kësaj marrëveshjeje.
Sekretari amerikan i Shtetit, John Kerry, ka paralajmëruar se Uashingtoni është duke konsideruar një plan B për Sirinë, nëse Damasku dhe Moska nuk tregojnë seriozitet për armëpushimin dhe negocimin e tranzicionit politik.
Konflikti civil në Siri ka nisur në vitin 2011.
Mbi 250,000 njerëz janë vrarë në luftime dhe miliona të tjerë janë detyruar të largohen nga shtëpitë.