Vogëlushi afgan, i cili është bërë hit i vërtetë në internet pasi ka veshur një fanelle, të bërë nga qesja e plastikës, të futbollistit më të mirë në botë, Lionel Messi, ka fituar tani fanellën e vërtetë nga vetë ylli i Barcelonës.
Fotografitë e Murtaza Ahmadit, pesë vjeç, me “fanellën e plastikës”, janë postuar online në muajin janar.
Dhurata nga Messi, Murtazait i është dërguar nga Fondi për Fëmijë i Kombeve të Bashkuara – UNICEF.
“Një grua nga UNICEF-i na ka kontaktuar dhe na ka thënë, pak ditë më parë, se Murtaza mund të fitojë një pako nga Messi”, ka thënë babai i Murtazait, Mohammad Arif Ahmadi, nga provinca Ghazni e Afganistanit.
“Ai është i lumtur për këtë dhuratë”, ka shtuar ai.
UNICEF-i në Afganistan ka postuar në ueb-faqen e tij edhe deklaratën e Murtazait, i cili ka thënë: “Unë e dua Messin dhe fanella thotë se edhe Messi më do mua”.