Tetëmbëdhjetë vjet pas vrasjes së mbi 50 anëtarëve të familjes Jashari nga forcat serbe të sigurisë, presidentja në largim e Kosovës, Atifete Jahjaga, ka kujtuar dhe nderuar “të gjithë ata që kanë rënë në altarin e lirisë”.
“Sot është dita kur mendohet për të ardhmen e gjeneratave të reja: duke lënë anash dallimet politike, duke hequr dorë nga inatet dhe egot dhe duke punuar fort për realizimin e aspiratave tona, për një ekonomi të zhvilluar që mban të rinjtë brenda shtetit, për një shtet të së drejtës, ku secili është i barabartë përpara ligjit, për një vend të begatë për secilin qytetar të tij”, ka thënë Jahjaga në manifestimin e Epopesë së Ushtrisë Çlirimtare të Kosovës.
Ky manifestim, që ka nisur sot dhe zgjat tre ditë, bëhet në përkujtim të Adem Jasharit, që njihet edhe si komandant legjendar i UÇK-së, dhe familjes së tij.
"Sakrifica legjendare e komandantit Adem Jashari dhe familjes së tij janë sublimim i synimeve shekullore për lirinë dhe pavarësinë e Kosovës", ka thënë presidenti i zgjedhur i Kosovës, Hashim Thaçi.
Sipas kryeministrit Isa Mustafa, kjo ditë dëshmon sakrificën e shumë njerëzve dhe gjeneratave për liri.
