Ministrja e tregtisë dhe industrisë e Kosovës, Hykmete Bajrami, ka nënshkruar vendimin për masa reciproke kundër Serbisë në fushën e transportit të naftës dhe gazit.
Përmes një njoftimi në profilin e saj në Facebook, ministrja Bajrami, ka treguar se vendimi vjen pasi Serbia ka refuzuar të njohë certifikatat e shoferëve dhe automjeteve kosovare që bartin materie të rrezikshme.
“Nga sot, Kosova nuk do t’i njohë dokumentet e njejta të lëshuara nga Serbia. Vendimi ka nisur të zbatohet nga Dogana e Kosovës, nga mbrëmë në orën 24:00”, ka thënë Bajrami.
Autoritetet e Serbisë disa herë kanë vepruar në kundërshtim me Marrëveshjen për tregti të lirë me vendet e rajonit, (CEFTA).
Në vitin 2008, menjëherë pas shpalljes së pavarësisë së Kosovës, për tri vjet radhazi, Serbia nuk u kishte lejuar produktet kosovare të hyjnë në tregun e saj.
Kurse, në vitin 2011, si masë reciprociteti autoritetet kosovare kishin bllokuar produktet e Serbisë.
Po ashtu, Serbia nuk ka respektuar edhe marrëveshjet e tjera ekonomike, që ishin arritur në bisedimet ndërmjet Prishtinës dhe Beogradit në Bruksel.