Hetuesit francezë kanë konfirmuar se një anije franceze ka marrë sinjale që janë lëshuar nga njëra kuti e zezë e avionit të linjës ajrore EgyptAir, i cili është rrëzuar në Detin Mesdhe në muajin maj.
Sinjalet janë kapur nga anija Laplace, e cila po bën kërkime në Mesdhe.
Në incidentin e 19 majit kanë humbur jetën të 66 personat që kanë qenë në bord.
Autoritetet duan të gjejnë kutitë e zeza, me të dhënat e regjistrimit, me qëllim që të përcaktojnë shkakun e rrëzimit të avionit.
Avioni ka qenë duke udhëtuar nga Parisi për në Kajro dhe është rrëzuar pak kohë pasi ka hyrë në hapësirën ajrore të Egjiptit.
