Prokuroria Themelore në Prishtinë, Njësiti për Krime Ekonomike dhe Korrupsion, ka ngritur aktakuzë në Gjykatën Themelore në Prishtinë kundër të të pandehurve: H.XH.TH, drejtoreshë e Shërbimeve Publike dhe Emergjencës në Kuvendin Komunal në Drenas, SH.B, zyrtar certifikues në Kuvendin Komunal në Drenas, V.J, zyrtar në Kuvendin Komunal në Drenas, dhe N.B pronar i një firme private.
Në komunikatën për media thuhet se "tre të pandehurit e parë akuzohen se në bashkëveprim kanë kryer veprën penale: keqpërdorim i pozitës apo autoritetit zyrtar", ndërsa "i pandehuri N.B akuzohet se u ka ndihmuar të pandehurve si persona zyrtarë në kryerjen e veprës penale: keqpërdorim i pozitës apo autoritetit zyrtar".
Sipas aktakuzës, të pandehurit H.XH.TH, SH.B dhe V.J ngarkohen për keqpërdorim të detyrës zyrtare me rastin e blerjes së një kamioni për fikjen e zjarrit për komunën e Drenasit, me ç’rast firmës private të të pandehurit N.B i kanë paguar shumën e parave në vlerë prej 110,000 mijë eurosh,
Pas ekzaminimit të kamionit, thuhet në komunikatë, është vërejtur se ai nuk i plotëson kriteret sipas kontratës dhe se pagesa për këtë kamion është bërë para se të bëhet pranimi teknik i mallit, në kundërshtim me Ligjin e Prokurimit Publik.
Prokurorja e rastit nga Prokuroria Themelore në Prishtinë ka kërkuar nga gjykata që të pandehurit t’i shpallë fajtorë dhe t’i dënojë sipas ligjit.
