Kryeministri në largim i Britanisë, David Cameron i ka thënë parlamentit të këtij shteti se njëherë nuk do e kërkojnë largimin zyrtar nga BE-ja.
Duke iu drejtuar deputetëve për herë të parë prej referendumit të 23 qershorit, Cameron e ka bërë të qartë se fillimisht do e kërkojnë negocimin e një marrëdhënie të re me BE-në.
Më 23 qershor, rreth 52 % e britanikëve kanë votuar për daljen e vendit të tyre prej Bashkimit Evropian.
Zyrtarë të BE-së po bëjnë presion që ky shtet tani të kërkojë zbatimin e nenit 50 të Traktatit të Lisbonës, veprim ky i nevojshëm kur një shtet dëshiron të largohet nga blloku i shteteve evropiane.
Mirëpo, kryeministri Cameron ka thënë se kjo varet tërësisht nga Londra, pasi edhe sipas rregullave të BE-së, futja në veprim e nenit 50 është tërësisht në duar të shtetit që dëshiron të largohet nga blloku evropian.