Autoritetet turke, zyrtarisht kanë ngritur padi ndaj 99 gjeneralëve, nga 360 oficerë të këtij niveli, për shkak të, siç thuhet, rolit të tyre në përpjekjen e grusht shtetit javën e kaluar, thanë zyrtarët turq.
Burimet thonë se edhe 14 gjeneralë të tjerë do të mbeten në paraburgim.
Autoritetet turke në ditët e fundit kanë ndërmarrë veprime të ndërrimeve masive dhe arrestimeve në ushtri, në shërbimet shtetërore dhe në sistemin e arsimit.
Deri më sot janë arrestuar, ndërruar ose pezulluar më shumë se 50 mijë njerëz.
Qeveria turke ndërkohë, ka ndaluar udhëtimin jashtë vendit për të gjithë akademikët, si pjesë e ndalesave të gjëra të vendosura në Turqi pas dështimit të grusht shtetit ushtarak më 15 korrik.
Bordi i Lartë i Arsimit i Turqisë në një kumtesë të publikuar më 20 korrik, tha se ndalesa do të vlejë “deri në një njoftim tjetër”.
Paralajmërimi u bë një ditë pasi Bordi I Lartë I Turqisë largoi nga puna 1577 dekanë të universiteteve gjithandej Turqisë dhe u mori licencat 21 mijë arsimtarëve që punonin ne institucionet private.
Masat e ndërmarra u panë si një sulm ndaj klerikut musliman që jeton në SHBA, Fethullah Gulen, I cili u akuzua se qëndron prapa përpjekjes së puçit, që rezultoi me vrasjen e mbi 200 njerëzve.
Gulen, që aktivisht promovon institucionet e arsimit në Turqi dhe në vendet e tjera, e ka dënuar përpjekjen e puçit dhe ka kundërshtuar cfarëdo lidhje të tij me të.
Ndërkohë, agjencia turke e telekomit më 20 korrik bllokoi qasjen në faqen e WikiLeaks, një ditë pasi rrodhën qindra mijëra emaile nga partia në pushtet e Drejtësisë dhe Zhvillimit.
WikiLeaks tha se kishte mbledhur emailat që prej para përpjekjes së puçit . (REL)
