Një zyrtar i lartë i ushtrisë amerikane në Afganistan tha sot se pesë ushtarë amerikanë janë lënduar në një betejë kundër militantëve të Shtetit Islamik, në lindje të Afganistanit.
Gjenerali i ushtrisë amerikane, John Nicholson, tha se trupat amerikane janë lënduar gjatë një misioni të përbashkët me forcat speciale afgane kundër militantëve të IS-it në provincën Nangarhar.
Ai tha se dy prej ushtarëve i janë kthyer detyrës, ndërsa tre të tjerë janë evakuuar, por gjendja e tyre është e mirë.
Presidenti amerikan, Barack Obama, në muajin qershor ndryshoi një rregullore që ua ndalonte forcave amerikane përfshirjen në operacione ushtarake kundër militantëve në Afganistan, përveç rasteve të jashtëzakonshme.
