Ekipit Olimpik kosovar i dorëzohet flamuri shtetëror

Ekipit Olimpik të Kosovës i është dorëzuar zyrtarisht flamuri shtetëror nga Presidenti, Hashim Thaci, një javë përpara pjesëmarrjes në Lojërat Olimpike në Rio të Brazilit. Ceremonia e pranimit të flamurit u organizua në amfiteatrin e Parkut Gërmia të Prishtinës me praninë e tetë sportistëve nga Kosova, të disiplinave të ndryshme sportive, që marrin pjesë në Lojërat Olimpike. Ekipi i Kosovës në Rio 2016 udhëhiqet nga kampionja botërore Majlinda Kelmendi, duke shënuar historinë për vendin. Kosova për herë të parë merr pjesë në Lojëra Olimpike që prej shpalljes së pavarësisë së saj, tetë vjet më parë dhe pranimit në Komitetin Olimpik Ndërkombëtar me të drejta të barabarta.