Gjykata e apelit në kryeqytetin e Azerbajxhanit ia ka refuzuar ankesën e gazetares hulumtuese Kadija Ismajlova, e cila ka kërkuar t’i hiqet ndalesa e udhëtimit jashtë vendit.
Gjykata në vendimin e sotëm e ka hedhur poshtë kërkesën e saj.
Ismajlova, kontribuese edhe e Radios Evropa e Lirë dhe fituese e çmimeve ndërkombëtare për gazetari është arrestuar në dhjetor të vitit 2014.
Ajo më pas është dënuar për evazion fiskal, abuzim me prona dhe akuza të tjera. Ajo është dënuar me 7 vjet e gjysmë burg.
Në maj, Gjykata Supreme e Azerbjaxhanit e ka reduktuar dënimin duke e kthyer në dënim me kusht prej 3 vjet e gjysmë, dhe duke urdhëruar lirimin e saj. Ky ndëshkim është reduktuar edhe më tej në 2 vjet e 3 muaj dënim me kusht.
Ismajlova dhe përkrahësit e saj thonë se akuzat kundër saj janë të motivuara politikisht si hakmarrje ndaj raportimeve të saj që e lidhin familjen e presidentit Ilham Alijev dhe familjen e tij me korrupsion.